Desisyon sa Korte bahin sa MCC gihangop

CEBU, Philippines - Gihangop sa mga tinun-an sa Mandaue City College (MCC) sa Tipolo campus nga gidumala ni Dr. Paulus Cañete ang bag-o lang nga giluwatan nga desisyon sa Regional Trial Court (RTC) sa dakbayan sa Quezon nga nagsupak sa tinguha sa Commission on Higher Education (Ched) nga tak-opan ang maong tulunghaan.

Matud pa sa mga tinun-an nga ang maong desisyon nga giluwatan ni Judge Eleuterio Bathan sa RTC Branch 92 sa Quezon City nga nadasig sila sa paglampus gyud sa ilang pagtuon.

Giangkon nila nga naapektohan gyud sila sa ilang pagtungha nga nabutang kanunay ang ilang tulunghaan sa kontrobersiya nga sa ilang tan-aw gumikan sa pamolitika.

Si Judge Bathan mipagawas og 20 ka adlaw nga temporary restraining order (TRO) nga nagpadayag sa pagsupak sa maong lakang sa CHED ug misalikway sa mga kalapasan nga gialigar ngadto sa maong tunghaan.

Sa iyang kamandoan, si Judge Bathan midili sa mga sakop sa CHED pagpasira sa maong tulunghaan nga gipagawas niadto pang Disyembre 10.

Si Atty. Alfredo Sipalay, maoy usa sa mga abogado sa MCC sa Tipolo Campus miingon nga tungod sa bag-ong kamandoan dako na kaayo og kahigayonan nga ang mga tinun-an nga mokuha og licensure examinations alang sa migradwar sa kurso nga edukasyon nga gikatakda karon Septiyembre 30 niining tuiga.

Kahinumduman nga niadtong 2010 miluwat og kamandoan ang CHED Manila sa pagsira sa MCC sa katarungan nga napakyas kini pagtuman sa mga gisitar nilang rekisito. (BANAT NEWS)