Mangga festival sa Kalunasan karon

CEBU, Philippines - Ipahigayon karong adlawa ang labing una nga Mangga Festival sa Barangay Kalunasan niining Siyudad sa Sugbo.

Ang over-all chairman sa maong kalihukan nga si Konsehal Marvin Leyson misaysay nga ang Kalunasan maoy sentro nga supplier sa sikat nga mangga sa tibuok kalibotan.

Base sa kasaysayan, ang Kalunasan sakop kaniadto sa Barangay Guadalupe apan gumikan sa kadako sa maong sitio, nahimo kining barangay nga buwag na sa Guadalupe.

Sa Kalunasan anaa mahimutang ang dako kaayong kamanggahan nga maoy tinubdan sa Mangga Carabao nga maoy giila nga labing lami nga klase sa mangga sa tibuok kalibotan.

Ang Mangga Festival salmotan sa siyam ka mga contingent   nga gitipon-tipon    gikan sa kapin sa 30 ka mga sitio.

Ang kagamhanan sa siyudad sa Sugbo migahin og kapin sa P283,000 isip abag niini sa maong tinuig nga kalihukan sa Kalunasan.

 Ang matag contingent gihatagan og tag P10,000 nga seed money nga maoy gigasto nila sa ilang mga kasangkapan sama sa uniporme ug uban pang panginahanglan alang sa pahiangay sa ilang mga ipahigayon nga   pasundayag sama sa street dancing ug uban pa.

Samtang ang kapolisan usab mipasalig nga higpit nilang bantayan ang seguridad sa maong kalihukan. (BANAT NEWS)