CEBU, Philippines - 323 BC—Namatay ang bantogang hari sa Macedonia nga si Alexander III the Great. Karong petsaha giingong namatay si Alexander samtang adunay ubang historian nga miingon nga namatay siya Hunyo 7, 323BC. Si Alexander mao ang giisip nga labing banggiitang military genius sa kasaysayan sa kalibutan. Ang Macedonia nga usa ka gamay’ng nasud misakop sa dul-an katunga sa kayutaan sa kalibutan dihang iyang gilupig ang emperyo sa Persia, India ug uban pang mga silingang kaharian. Nahimo siyang inspirasyon sa misunod nga mga hari nga sila si Hannibal the Carthaginian, ang mga emperador sa Roma nga sila si Pompey ug Caesar, ingon man si Napoleon.
1832---Natawo ang German engineer nga si Nikolaus August Otto ang unang miimbento sa four-stroke internal-combustion engine nga maoy gihimong basehanan sa tanang matang sa mga makina sa sakyanan, barko ug bisan na sa mga abyon karong panahona. Ang imbensyon ni Otto maoy nahimong labing unang praktikal nga alternatibo sa kaniadto sikat apan baga kaayo og aso nga steam engine. Ang makinang naimbento ni Otto gitawag og Otto-cycle engine nga dunay kaparehas nga prinsipyo sa makinang naimbento usab sa French engineer nga si Alphonse Beau de Rochas.
1943—Na-patented ang labing unang ball point pen nga naimbento ni Laslo Biro. Ang ball point pen ni Biro migamit og paspas kaayong maugang tinta (ink) niadtong 1938 samtang siya usa pa ka journalist nga magsusuwat sa Budapest, Hungary. Si Biro mieskapo gikan sa mga Nazi German sa pagsugod sa Ikaduhang Kalibutanong Gubat ug gikahimamat ang Briton nga si Henry Martin sa Buenos Aires sa Argentina nga nakakita sa ball point pen ni Biro nga nakakita sa kamahinungdanon niini ilabi na sa air crews nga magkwentada sa ilang nabigasyon samtang naglupad sa kalangitan. Si Martin nakakuha sa katungod sa paghimo og daghang susamang ball point pen hangtud nga nahimo na kining labing gamit kaayong butang sa tawo sa pagsulat. (FREEMAN)