CEBU, Philippines - Nawingig ang usa ka polis human kini kulataha sa usa ka American national didto sa sitio Luray 1, barangay Poblacion, dakbayan sa Toledo sa miaging gabii.
Ang suspetsado nailhan nga si Eduard Scott Lessor, 50, ug kasamtangang nagpuyo sa Magsaysay Hills sa barangay Poblacion sa maong dakbayan.
Giposasan ang maong suspek human niini kulataha si PO2 Celso Maquidato sa Toledo City Police kinsa misita sa nahauna bahin sa giingong pag-panghasi niini sa Luray 1 base sa sumbong ni Joselyn Marinay nga nagpuyo sa maong lugar.
Matud pa ni SPO4 Carmelito Hornales sa Toledo Police Station nga wala makabantay ang biktima kay kalma man kining miduol sa suspetsado nga nagbarog sa atubangan sa usa ka vulcanizing shop sa Luray 1, ug dihang gisukit kun tinuod ba kining nanghasi, mikalit lang og panumbag ngadto sa apapangig sa biktima tulo ka higayon hinungdan nga nawingig kini. (BANAT NEWS)