Di special non-working holiday sa Hunyo 11

CEBU, Philippines - Wala ideklarar sa Malacañang nga special non-working holiday ang Hunyo 11 bisan natunong kini sa adlaw nga Lunes nga gisundan sa pagsaulog sa Independence Day sa Hunyo 12 nga natunong sa adlaw nga Martes nga usa ka regular holiday.

Sa report sa Philippine Information Agency (PIA) 7 nasayran nga si Deputy Presidential Spokesperson Abigail Valte nagkanayon nga magpabilin sa adlaw’ng Martes sa Hunyo 12 ang pagsaulog sa Adlaw sa Kagawasan o Independence Day sa nasud.

“We will celebrate as it falls so June 12, Tuesday,” matud pa ni Valte.

Kini tungod usab sa Proclamation No. 295 s. 2011 nga nauna nang gilagdaan ni Presidente Benigno “Noynoy” Aquino III sa mga nalistang regular ug legal holidays sa nasud karong tuiga.

Kahinumduman nga wala mosunod si Aquino sa naandang Holiday-economics ni kanhi Presidente Gloria Macapagal Arroyo nga awtomatikong mobalhin sa pista opisyal duol sa Sabado ug Domingo aron mataas-taas ang bakasyon sa publiko. (BANAT NEWS)