Cuenco magpabilin sa Team Rama

CEBU, Philippines - Bisan pa man sa gikatakda nga pagbalhin sa sunod mga adlaw ni kanhi Kongresista Antonio Cuenco ngadto sa Partido Demokratiko Pilipino-Lakas ng Bayan (PDP-Laban) giingong magpabilin gihapon kini sa grupo ni Mayor Michael Rama kinsa sakop sa Liberal Party.

Kini maoy gibutyag sa campaign manager sa Team Rama nga si Konsehal Joey Daluz kinsa mosunod usab ni Cuenco nga mobalhin sa PDP-Laban. Nasayran nga mahimong ikaduha unya nga politiko si Cuenco nga mobalhin sa maong grupo human ni Governor Gwendolyn Garcia.

Gikataho nga si kanhi Senador Aquilino “Nene” Pimentel Jr. ug ang anak niini nga si Senador Aquilino “Koko” Pimentel III maoy nangimbitar kang Cuenco nga magpasakop sa PDP-Laban. Gipadayag ni Daluz nga si Cuenco maoy usa sa mga nangulo kaniadto sa maong partido ingon man usab ang iyang inahan nga si “Inday Nita” Cortez-Daluz.

“Sila si Cuenco gyud ug ang akong inahan maoy pipila sa mga nag-una nga sakop sa PDP, busa mo-join pud ko sa maong grupo,” sumala pa ni Daluz. Wala na mokomento si Daluz kung unsay mamahimong resulta kung mohimo usab og lokal nga grupo ang PDP alang sa local election sanglit si Rama nagpahimutang man sa Liberal.

Gibarogan ni Daluz nga sa pagkakaron, nagpabilin sa Team Rama si Cuenco bisan pa man nga dili sila susama og nasudnong partido.  (BANAT NEWS)