Publiko gipasidan-an bahin sa dengue

CEBU, Philippines - Subling mipasidaan ang mga kadagkoan sa panglawas nga batasanon gyud ang pagpanglimpyo sa ilang palibot aron mapakgang ang pagsanay sa lamok nga magdala sa sakit nga dengue.

Matud pa ni Cristina Giango, Integrated Provincial Office Chief sa probinsya sa Sugbo upat na ka tawo ang namatay gikan sa bulan sa Enero hangtod sa Hunyo ning tuiga gikan sa Minglanilla ug Liloan.

Karong panahon sa ting-ulan gipasidan-an niya ang publiko nga daghang matang sa mga sakit nga mahimong motakboy sa tawo ilabi na sa kabataan nga maoy humok kaayong mataptan ilabi na sa sakit nga dengue.

Sa pagkakaron ang mga lungsod nga dunay daghang nasakit og dengue mao ang Minglanilla, Liloan, Talisay, dakbayan sa Bogo ug Daanbantayan.

 Ang dengue usa ka makatakod nga sakit tungod sa virus nga gikan sa pagpaak sa lamok nga Aedes aegypti ug Aedes Albopictus, nga usa ka matang sa lamok nga mopaak kun adlawan ug mabuhi sa sulod ug sa palibot sa mga balay.

Ang timailhan sa sakit nga dengue mao ang kalit nga pagsaka sa hilanat nga molungtad sa duha ngadto sa pito ka adlaw, panakit sa ulo, pagsakit sa kaunoran ug kabukugan, pagkaluya, dunay mga gagmay’ng tuldok nga pula-pula sa panit, magsakit ang tiyan, magdugo ang ilong, lagos ug magsuka og dugo ug itom kolor sa hugaw tungod kay ang tinai magdugo man. Aron malikayan ang dengue likayang dunay mga mapundohan og tubig sama sa mga lata, balde, plastik, bagol, bukong, botelya, ligid ug bisan unsang lim-aw sa palibot sa balay tungod kay kini maoy itlogan sa mga lamok.

Makatabang usab ang pagpanglimpyo sa sulod ug gawas sa balay, tapangko sa atop, paggamit og mosketiro, pagbutang og screen sa pultahan ug mga bintana ug usab dili paghatag og aspirin sa tawo nga gidudahang nasakit og dengue kay makasamot kini, mas maayong modiretso sa tambalanan.  (BANAT NEWS)