Not guilty pangangkon sa 'killer' ni Apura

CEBU, Philippines - Mi-plead ‘not guilty’ ang gipasanginlang gunman sa pagpusil patay sa anak sa mayor sa syudad sa Carcar, Carl Vinson Apura atol sa gipahigayong arraignment sa kaso niini kagahapon.

Si Jay Boy Lauron nga lumad nga taga barangay Valladolid syudad sa Carcar miatubang kagahapon sa sala ni RTC Branch 5 Douglas Marigomen diin gibasahan siya sa salaod nga iyang nabuhat.

Dihang gipangutana kini sa korte kun guilty ba siya sa salaod nga iyang nahimo kini mitubag nga dili siya guilty.

Si Lauron nga nahinabi sa mga tigbalita mibutyag nga wala siya makasabot sa iyang gibati sa dihang miatubang na siya sa korte apan wala na usab siya modetalye sa rason niini.

Kahinumduman nga si Lauron nasikop sa barangay Onion lungsod sa Catigbian, Bohol sa upat niya ka adlaw nga pagtagotago human niya giingong napatay ang anak sa mayor.

Nasayran nga niadtong Mayo 12 ning tuiga gipatay ang biktima atol sa gipahigayong disco concert sa nahisgutang lugar tungod sa giingong ‘suyaay.’

Human sa nahitabo sa anak sa mayor sa maong lugar misunod gilayon ang duha ka pagpamusil sa wala pa gihapon mailhing mga tawo nga nagmotorsiklo nga mikalas usab og duha ka kinabuhi.

Ang hepe sa kapolisan sa lalawigan sa Sugbo nga Sr. Supt. Patrocinio Comendador naalarma dayon sa maong hitabo ug mibutang og dugang polis sa Carcar. (BANAT NEWS)