Kabalaka pag-armas sa mga rebelde gipadayag

DUMAGUETE CITY, Philippines  – Ang mga kadagkoan sa Katolikong Simbahan sa Negros mipadayag sa ilang kabalaka sa planong pag-armas sa mga kanhi rebeldeng Revolutionary Proletarian Army-Alex Boncayao Brigade (RPA-ABB) kun mahingpit na ang sabot-kalinaw tali sa mga rebelde ug sa gobiyerno.

Si Padre Burton Villarmente, ang coordinator sa Social Action Center of the Diocese of Dumaguete, mibutyag nga usa kini sa mga isyung ilang gituki sa mga kadagkoan sa simbahan sa Negros sa ilang regular nga tigom sa Church-Military Advisory Group (CMAG) nga gihimo sa maong dakbayan dili pa dugay.

Si Villarmente miingon nga lakip sa giingong nigawas nga mga plano sa nagpadayong negosasyon tali sa gobiyerno ug sa RPA-ABB mao ang pagtugot sa pipila ka mga sakop sa maong grupo nga makadala og armas sa mga piniling lugar isip proteksyon batok sa pagpanghasi ug posibleng pagpanimawos kanila.

Ang RPA-ABB usa ka breakaway group sa New People’s Army, ang armadong pwersa sa Communist Party of the Philippines nga karon nakig-negosasyon na alang sa kalinaw sa gobiyerno.

Matud pang Villarmente ang SAC coordinators nga mitambong sa maong tigom dunay pagduhaduha sa maong planong armasan ang mga RPA-ABB tungod kay maabuso unya kini kung dili higpit ang mga patakarang magsuporta niini.

Ang mga opisyal sa militar una nang mipahibalong kun mahingpit na ang negosasyon dunay pipila ka mga sakop sa RPA-ABB ang bansayon susama sa Civilian Armed Auxiliary (CAA) sa Philippine Army ug tugotang makadala og armas isip magbalantay sa mga barangay.

Ang mga sakop sa CMAG naglangkob sa mga kadagkoan sa Armed Forces of the Philippines, Philippine National Police, ug upat ka diyosisis sa Negros. Ang grupo subling magtigom karong tuiga dugang pa ni Villarmente. (BANAT NEWS)