Estudyanteng gidaugdaog gitagad

CEBU, Philippines - Bisan paman sa kahapsay ug kamalinawon sa unang adlaw sa pagbukas sa klase, ang Department of Education (DepEd) 7 nakadawat gayud og mga reklamo gikan sa mga ginikanan sa magtutungha.

Matud pa ni Eda S. Cabantan, Head of Regional Oplan Balik Eskwela Action Center sa Dep-Ed 7 nga ang tanan hapsay gayud kaayo tungod kay ang mga magtutungha sa pampublikong tunghaan mireport man gayud sa unang adlaw sa klase gawas lamang niining duha ka reklamo nga ilang nadawat nga nakapaagni sa iyang atensyon.

Si Cabantan nagkanayon nga ang unang reklamo naggikan sa ginikanan sa usa ka lalaki nga tinun-an sa Grade III sa Tejero Elementary School sa syudad sa Sugbo nga miingon nga ang iyang anak nabiktima sa bullying kon panaugdaog hinungdan nga ang maong tinun-an dili na gustong mobalik pa sa maong tunghaan ug gusto kining mobalhin ngadto sa Mabolo Elementary School.

Ang maong ginikanan gitambagan ni Cabantan nga moduol kang Dr. Rhea Angtud, Schools Division Superintendent sa syudad sa Sugbo aron kasolusyonan ang ilang hangyo.

Sa pakighinabi sa Banat News ni Dr. Arden D. Monisit, Schools Division Superintendent sa probinsya sa Sugbo iyang gibutyag nga bag-ohay lamang siya nga nakadungog sa maong problema, apan hinuon matud pa niya nga makig-alayon siya sa ubang kadagkuan sa DepEd sa pag-umol og programa aron kasolusyonan ang maong problema.

Sa laing bahin nakadawat usab si Cabantan og hangyo nga assistance gikan sa Minglanilla Central School mahitungod sa 20 ka mga magtutungha nga wala pa ma-enroll tungod kay gipangayoan sila og amotan apan ang mga magtutungha gitambagan sa kadagkuan sa DepEd sa pag-adto gilayon sa ilang school principal sa higayong makasugat sila sa susamang problema

Ubos sa DepEd Order no. 41 series of 2012 si Education Secretary Armin Luistro mimando sa tanang kadagkuan sa tunghaan nga kinahanglang walay bayranan nga kolektahon gikan sa tinun-an sa Kindergarten hangtod na sa tinun-an sa Grade IV atol sa school year 2012-2013 ug usab wala gayuy pangolekta og bayranan gikan sa Hunyo hangtod Hulyo 2012 sa mga tinun-an sa Grade V hangtod 4th year high school.

Hinuon sugod sa Agosto 2012 hangtod sa pagtapos sa school year 2013, adunay mga boluntaryong balayranan nga kolektahon sama sa Boy Scouts ug Girl Scouts membership fees nga P50, Philippine National Red Cross nga P35, Anti-TB fund drive nga P5, school publication fee nga P60 alang sa matag elementaryang tinun-an ug P90 alang sa matag tinun-an sa high school.

 Ang Parents-Teachers Association fee kinahanglang rasonabli gayud ug nga kinahanglang determinahon atol sa PTA general assembly. (BANAT NEWS)