Tag-iya'g KTV gikasohan na

CEBU, Philippines - Gipasakaan og kasong Qualified Trafficking ang usa ka tag-iya og KTV Bar sa uptown area ning dakbayan sa Sugbo samtang nasalbar usab sa mga sakop sa Regional Anti-Human Trafficking Task Force ang 146 ka mga babaye sa maong bar. Sa imporsyon nga gihikay ni Prosecutor Gandhi Truya ,iyang nadesisyonan nga masang-at ngadto na sa korte ang nahisgutang kaso ug walay piyansa nga girekomendar niya.

Ang mag-atubang og kaso nga qualified trafficking mao sila si Vinson Young Alyas Benzon Ong, Benny Young alyas Benny Ong, ‘Tiko/Tico’ ug ‘Ann’ ang gipasakaan sa maong kaso.

Samtang ang mga na-rescue nga mga babaye nagpangidaron og 16-anyos ngadto sa 17-anyos.

Gani, miduso pa og motion for reconsideration ang kampo ni Young apan gibasura usab kini human makita nga walay igong basehan aron maaprobahan ang maong mosyon.

Sayo niini ang kapolisan sa Anti-human trafficking mipahigayon og surveillance sa Jaguar KTV Bar human sila makadawat og report bahin sa ilegal nga kalihokan niini.

Pinaagi sa usa ka entrapment operation niadtong buwan sa Abril nasalbar sa kapolisan ang 146 ka mga babaye nga pulos giingong mga GRO kinsa kasagaran niini mga menor de edad.

Gisikop usab sa kapolisan ang nahisgutang mga tagdumala sa maong bar sa maong higayon. (BANAT NEWS)