Reklamante maoy milihok aron makakiha

CEBU, Philippines - Hepe sa Tabogon Police Station ug imbestigador niini gireklamo sa usa ka ginang sa Provincial Investigation and Detective Management Branch (PIDMB) human dul-an sa usa ka buwan nang wala mapasaka ang kaso batok sa ilang gireklamo ngadto sa         piskaliya.

Ang gireklamo mao sila si Insp. Lamberto Hibaya ug PO3 Gregorio Licayan, imbestigador sa Tabogon Police Station.

Si Atty. Julius Ompad, hepe sa PIDMB nga nahinabi sa Banat News nagkanayon nga si Razel Buot, 38, taga Muabog, Tabogon mitug-an kaniya nga niadtong Mayo 6 sa ala-una sa kaadlawon gisunog ang ilang balay sa ilang silingang si Ronald Inahib.

Apan wala masang-at ang kaso sa piskaliya kay giingong giunya-unya ni Licayan nga maoy nag-imbestigar sa kasong arson hangtud nga miabot sa punto nga gipasa sa naulahi ngadto kang Hibaya.

Matud ni Buot nga pagka Mayo 11 gisaaran siya ni Licayan nga kuhaan siya og affidavit apan wala kini mahitabo ug gipabalik siya pagka Mayo 14 apan wala gihapon mahuman ug mihangyo si Licayan kaniya nga sa liwas nalang sa pista sa Tabogon (Mayo 19-20).

Mayo 21 mibalik siya apan wala si Licayan kay giingong atoa ra sa ilang balay nagtiwas og himo sa affidavit, nianang pagkasunod adlaw giadto niya sa balay si Licayan apan giingong gikasab-an siya niini.

Gikatahong giingnan pa hinuon siya nga dili angayang magdali kay bisan og 20 pa ka tuig dili mo-expire ang kaso ug dili pud sayon mamunit og Eninglis, tungod niini wala makatingog si Buot ug miadto nalang kang Hibaya.

Niadtong Mayo 28 misaad si Hibaya nga adtuon ang balay ni Buot apan wala kini adtoa hinungdan ang reklamante mibalik sa police station nianang petsa 31 aron mangayo nalang og kopya sa blotter ug affidavit apan giingong gikasab-an ni Hibaya ang reklamante.

“Sa laktod wala mapasaka ang kaso nga unta sa effort na sa pulis,” pasabot pang Ompad.

Matud ni Buot nga gitabangan siya sa usa ka concerned citizen sa lungsod ug mao nalang ang nihimo sa iyang affidavit ug niadtong Martes ang reklamante nalang ang mipasaka sa kasong arson diha sa provincial prosecutor’s office.

“Remiss kaayo ba, kay imbes atong tabangan ang reklamante nga mapasaka ang kaso, lain na hinuon ang gidangatan kay gikasab-an na nuon siya ni Hibaya nga gikan man unta na siya diri (PIDMB) tingali na-pressure lang siya didto,” dugang pa ni Ompad.

Gusto ni Buot nga magkaatubang sila ni Hibaya ug Licayan aron mapasabot sa duha ka pulis ang gihimo ngadto kaniya.

Karong petsa 13 sa sunod semana adlaw’ng Miyerkules mag-atubang sila si Buot, Hibaya ug Licayan sa buhatan sa PIDMB.

Si Buot kinsa midangop sa Banat News ug DyDD nagkanayon nga nagsugod sa yuta ang ilang panagbangi tali kang Inahib kay buot siyang papahawaon sa naulahi. (BANAT NEWS)