Armas ug shabu nasakmit

CEBU, Philippines - Duha ka mga lalaki ang nadakpan ug nakuhaan og armas ug ilegal nga drugas sa pagresponde sa usa ka kagubot diha sa sitio Sto. Rosario sa Brgy. Jagobiao sa dakbayan sa Mandaue kagahapon sa kaadlawon.

Ang mga nasikop mao si Ernesto Ynclino, 48, ug ang silingan niini nga si Donald Godinez, 28, usa ka habalhabal driver, dihang sila nasugatan sa grupo ni Sr. Insp. Wilson Abot nga miresponde sa dapit apan nagduda sa ilang mga lihok.

Atol sa pagrekisa nakuha sa posisyon ni Ynclino ang usa ka kalibre .357 ug lima ka gagmay’ng pakete sa gituohang shabu, samtang si Godinez nakuhaan usab og tulo ka gagmay’ng pakete nga may sulod nga gidudahang shabu.

Gisusi usab sa kapolisan kung dunay kalambigitan ang duha sa mga nahitabong mga pagpanulis ug uban pang krimen sa dakbayan.

Kasong kalapasan sa RA 9165 si Godinez, samtang si Ynclino kasong kalapasan sa RA 8294 kon paghupot og armas nga walay lisensiya ug RA 9165 sa illegal nga drugas ang atubangon niini. (BANAT NEWS)