"Type O" streamers gipanglarot

CEBU, Philippines - Gisugdan na kagahapon ang pagpanglangkat sa mga streamers sa kadalanan sa siyudad nga gihulagway nga nakahugaw sa siyudad isip kabahin sa “Beautification Project” sa dakbayan.

Lakip sa gitangtang ang mga streamer nga dunay suwat nga “Type O” nga giingong propaganda material sa Bando Osmeña Pundok Kauswagan.

Ang chief of staff ni Mayor Michael Rama miklaro nga ang tanang streamers nga nakahugaw maoy ilang gipanglangkat ug dili kay ang “Type O” ra sanglit wala nila kini sagoli og pamolitika.

“Wala’y pili , bisan ang streamers sa city government nga gibutang sa dili saktong lugar ipatangtang na pud,” matud pa ni Zafra.

Giingong nagkatap na karon ang mga propaganda materials sa nagkadaiyang kadalanan nga gipamutang lang sa bisan asa ug lakip na ang poste.

Apan giklaro ni Osmeña nga dili siya maoy nagpahimo niini apan nagtuo siyang inisyatiba ra kini sa iyang mga supporters ug nagdumili siya pagkomento sa pagpanangtang niini.

Ang Department of Public Services (DPS) ug Squatter Prevention Encroachment Elimination Division (SPEED) maoy gitahasan sa siyudad sa maong gimbuhaton.

Lakip sa panangtangon mao ang gipamutang sa mga center islands ug kung nahaom pa kini sa petsa. (/EIM) (BANAT NEWS)