CEBU, Philippines - Pormal nang gitunol kagahapon sa buntag sa presidente sa PNP Defense Press Corps nga si Chito Aragon ang kwartang gikita sa gipahigayong Concert for a Cause sa miaging semana ngadto kang Sr. Supt. Melvin Ramon Buenafe, hepe sa Cebu City Police Office (CCPO).
Human sa flag raising ceremony kagahapon sa buntag diha sa CCPO Headquarters si Aragon uban sa mga sakop niini nga sila si Chona Carreon, Decemay Padilla, Ryan Christopher Sorote mitunol sa P16 mil ngadto kang Buenafe.
Duha ka mga pulis nga sila si SPO2 Ariel Coloscos ug PO2 Philip Plasos nadestino sa Scene of the Crime Operatives (SOCO) maoy makadawat og tag P8 mil samtang karung sunod semana human sa flag raising ceremony sa Cebu Provincial Police Office (CPPO) ihatag usab ang P7 mil ngadto ni SPO4 Obiso.
Ang tulo ka pinuy-anan sa tulo ka mga pulis naglakip sa kapin 300 ka panimalay nga naugdaw sa dakong sunog sa barangay Luz sa miaging buwan. Matud ni Aragon nga mikita og P23 mil ang PNP-Media Concert for a Cause niadtong Mayo 25, ug mao kini gibahin-bahin sa tulo ka mga pulis nga naapektahan sa maong sunog.
Si Buenafe sa iyang bahin, malipayon kaayong midawat sa P16 mil nga cash miingon nga dako na kaayo kini og ikatabang sa duha ka pulis.
Kini maoy ikaduhang higayon nga mipahigayon og concert for a cause ang PNP-Media ug una sa miaging tuig diin naigo sa sunog ang barangay T. Padilla ug dunay mga sakop sa media nga nasunogan ang ilang balay.
Subay niini, ugmang adlawa (Miyerkules) mang apod-apod og mga school supplies si Buenafe ug mga sakop niini ngadto sa pipila ka mga tinun-an sa barangay Luz nga naglisod ang ilang mga ginikanan pagpalit og mga gamit sa tunghaan human ang ilang pinuy-anan nalakip sa pagkaugdaw. - BANAT NEWS