Ang kasaysayan karon

CEBU, Philippines - 1899--- Gipatay si General Antonio Luna sa mga sakop ni General Emilio Aguinaldo sa Cabanatuan, Nueva Ecija. Ang mga tropa ni Luna nga gitawag kaniadto og Kawit Company atol unta sa pakigkita niya kang Aguinaldo nga mipatawag kaniya diha sa buhatan niini sa usa ka kombento sa Cabanatuan. Apan pag-abot didto wala si Aguinaldo. Didto nasugatan ni Luna ang mga sundalong iyang gipaaresto tungod sa pagkatalawan sa giyera apan gipangbuhian ni Aguinaldo. Ang maong mga sundalo mao sila si Capt. Pedro Janolino ug ang mga sakop sa Kawit Battalion gikan sa Cavite nga mga kababayan ni Aguinaldo. Ang maong mga sundalo gipaaresto ni Luna dihang sila nagtinalawan ug wala motuman sa kamandoan ni Luna atol sa ilang pakiggubat sa mga Amerkano niadtong Pebrero 10,1899 sa Caloocan. Lakip sa gipatay sa maong adlaw ang mga sakop ni Luna nga misuway og tabang kaniya apan sila gitabangan og dunggab ug gipamusil. Ang katapusang pulong ni Luna mao ang “Mga traydor!”

1900—Natawo ang nakaimbento sa holography nga mao ang Hungarian-British physicist ug electrical engineer nga si Dennis Gabor. Ang holography usa ka sistema sa paggamit sa labing unang three-dimensional photography nga wala mogamit og lente( lens).Lakip sa mga gituki ni Gabor ang high-speed oscilloscopes, communication theory, physical optics, ug ang telebisyon. Nakaimbento si Gabor og kapin 100 ka mga butang ug gamit nga hangtud karon gigamit pa sa tawo.

1819 — Natawo si John Couch Adams ang usa sa mga astronomer ug mathematician sa Britanya nga usa sa duha ka mga tawong nakadiskubre sa planetang Neptune. Lakip sa kontribusyon ni Adams mao ang pagtuon sa Leonid meteor shower (1866) nga diin iyang gipakita ang meteor shower susama sa usa ka kometa. - BANAT NEWS