CEBU, Philippines - Hapsay ug malinawon ang pagbukas sa klase sa tanang elementarya ug high school nga mga tulunghaan sa kagamhanan dinhi sa dakbayan sa Sugbo kagahapon
Apan bisan kun nagsugod na ang klase padayon gihapon nga nanawat ang matag tulunghaan sa mga late enrollees sumala pa ni Nicomedes S. Tuap, Principal III sa Tejero Elementary School.
Ang barangay Tejero usa sa mga barangay ning dakbayan sa Sugbo nga nasabak sa sunog sa miaging tuig ug daghan kaayong mga molupyo nga nasugamak sa bug-at nga problema.
Apan bisan pa niini nasuta ni Tuap nga wala makaapektar ang maong problema sa tinguha sa mga ginikanan nga makapadayon sa pagtungha ang ilang mga anak.
Kini tungod kay kagahapon sa buntag nasuta niya nga mikabat na sa 3,274 ka mga bata ang mitambong sa ilang tagsa-tagsa ka klase ug gituohan nga hangtod matapos kining semanaha mosaka pa ang gidaghanon sa mga estudyante sa maong eskuylahan.
Sa milabay’ng tuig mikabat sa 2,300 ang tanang estudyante sa maong eskuylahan sumala pa ni Tuap.
Samtang ang 95 usab ka magtutudlo sa Tejero mitunga ang tanan kagahapon ug wala na magproblema sa mga lingkoranan ug sa ilang lawak klasehanan tungod kay daan nang naandam ang tanan sukad pa sa miaging semana dihang gilusad ang Brigada Eskwela sa Department of Education.
Bahin usab sa seguridad, nagpasalamat si Tuap sa kapolisan tungod kay nakita niya nga may napulo ka mga polis ang gidestino sa palibot sa eskuylahan kagahapon sa buntag.
Matud pa niya nga gibantayan pag-ayo nila ang mga bata pinaagi sa pagbutang permanenting security guard, may mga barangay tanod usab nga mopuli pagbantay sa panahon nga mopahuway na ang mga security guard.
Sa samang higayon gibutyag usab sa principal sa Tejero nga kagahapon pormal usab nga gibuksan sa unang higayon ang klase sa first year ug second year high school sa maong eskuylahan. Ang maong tulunghaan para lang sa elementarya nga klase sukad pa sa sinugdan, matud pa niya. - BANAT NEWS