CEBU, Philippines - Nahimong dili hikalimtang bati nga kasinatian sa usa ka 10-anyos nga tinun-an ang unang adlaw sa iyang pagtungha sa klase kagahapon human kini madasmagi og motorsiklo sa barangay Tangil sa lungsod sa Dumanjug kagahapon sa alas 12:00 sa udto.
Ang biktima mao si Mark Lawrence Jongoy, 10 anyos ug tinun-an sa Tangil Elementary School ug nagpuyo ra usab atbang sa maong tunghaan sa maong lugar.
Samtang ang drayber sa habal-habal nga nagpaturagas ra og padagan sa iyang motorsiklo giilang si Magno Ardon Georpe, 40, taga barangay Cogon, Dumanjug.
Matud ni PO2 Ramon Chinel sa Dumanjug Police Station dihang nahinabi sa Banat News paingon si Georpe sa barangay Bitoon nianang tungora apan sa paglabay niini sa tungod sa maong tunghaan mao say paglabang sa biktima nga excited na untang mosulod sa iyang klase.
Bitbit pa ang iyang bag nga gisudlan sa iyang gamitonon sa klase dihang nadasmagan si Jongoy ug nalagpot una pa nalamba sa karsada. Ang biktima human madapati og pasiunang tambal sa Barili District Hospital gibalhin kini sa tambalanan sa Vicente Sotto Memorial Medical Center (VSMMC) dinhi sa dakbayan sa Sugbo tungod sa kagrabe sa kahimtang niini. - BANAT NEWS