Kawani sa DWUP miangkong migamit og drugas

CEBU, Philippines - Mihimo og surpresang drug test kagahapon ang City Office on Substance Abuse Prevention (COSAP) sa 73 ka mga kawani ug job orders sa City Hall nga nadestino sa Department for the Welfare of the Urban Poor (DWUP).

Human sa drug test, usa ka empleyado ang awtomatikong miangkon nga nakagamit siya og ilegal nga drugas niadtong Sabado.

Ang pangulo sa COSAP nga si Joey Herrera misaysay nga dako ang posibilidad nga dili na i-renew ang kontrata sa maong lalaking empleyado kansang kontrata matapos karong buwana.

Dugang pa ni Herrera nga human sa DWUP, isunod dayon nila ang ubang departamento sa City Hall tungod kay importanteng limpyo gikan sa maong ilegal nga drugas ang mga kawani sa gobiyerno.

Matud pa ni Herrera mismo sa iyang departamento adunay gitaktak sa milabay’ng tuig human mamatud-ing migamit og ginadiling drugas.

Ang hepe sa DWUP nga si Atty. Collin Rosell mihangop sa lakang sa COSAP aron gyud masuta ang mga empleyado nga misulod sa dautang elemento.

Gawas sa mga kawani sa City Hall, magpadayon gihapon ang pagpahigayon nila og surpresang drug test sa mga barangay.

Samtang gipahibalo sa COSAP nga usa ka kawani sa City Treasurer’s Office ang nagpositibo sa confirmatory test. Kahinumduman nga dili pa lang dugay, mihimo usab og surpresa nga drug test ang COSAP sa maong buhatan.   - BANAT NEWS