CEBECO makabayad na sa buhis

CEBU, Philippines - Malaumon si Gobernador Gwendolyn Garcia nga sulod ning buwana, hingpit na nga makabayad sa buhis sa yuta   ang Cebu Electric Cooperative (CEBECO) 1, 2 ug 3.

Sa tigum nga gipatawag sa gobernador sa miaging adlaw didto sa Capitolyo gipresentar nila ni Provincial Treasurer Roy Salubre ug Provincial Assessor’s Office Officer In charge Anette Vero ang resulta sa joint inventory sa Kapitolyo ug CEBECO sa kahoy, puthaw ug konkreto nga mga poste, transformer ug, ug ang computation sa bayranan sa buhis ning tuiga.

Nanglangkub niini sa tax due nga kapin sa P20 milyones sa CEBECO 1, kapin sa P29 milyones sa CEBECO 2 ug kapin   sa P21 milyones sa CEBECO 3.

Sa maong tigum subli nga mihatag og tseke ang Asst. General Manager sa CEBECO 2 nga si Gannymede Tiu balor og P10 milyones.

Samtang mikabat usab og P 22 milyones ang nabayad sa CEBECO 2 sa ilang bayranan sa buhis nga kapin sa P29 milyones.

 Samtang ang CEBECO 1 una nang nakahatag og P5 milyones. (Chester Abadilla/WC)

10 massage parlor may ‘extra service’

Ni Sandn Anadia

Dul-an na sa napulo ka massage parlors dihi sa siyudad sa Sugbo ang gipanid-an sa Cebu City Anti-Indecency Board (CCAIB) gumikan sa mga nadawat nga report nga nagtanyag sila og “extra service” ngadto sa ilang mga kustomer.

Ang tsirman sa CCAIB nga si Dr. Lucille Mercado miingon nga kanunay ang gihimo nila nga surpresang inspeksyon ngadto sa mga massage parlors karong panahona.

Sumala pa ni Mercado nga pipila sa ilang nadawat nga impormasyon nga wala masayod ang mga tag-iya sa establisamento sa ‘extra service’ nga gibuhat sa ilang mga masahista.

Sumala pa niini nga ipaagi lang sa masahista sa sabotsabot ngadto sa kustomer katuyoan niini bugti sa bayad, apan duna say mga massage parlor nga ang mismong tag-iya maoy nagtugot sa ‘extra services’ nga buhaton sa ilang masahista bugti gihapon sa bayad. Mensahe pa ni Mercado nagdto sa mga nanag-iya og massage parlor nga magtinarong sa ilang mga negosyo gumikan kay dili magpangikog ang CCAIB sa pagpasira unya sa ilang establisamento kun sila masakpan. (BANAT NEWS)