Nanagpa'g 6-anyos gikasohan

CEBU, Philippines - Tungod sa pagpanagpa sa usa ka 6-anyos nga bata, usa ka amahan gikiha og child abuse.

Nasuta ni Fiscal Alex Gabud nga may igong basihanan ang testimonya sa batang babaye batok kang Armando Sato, nga ilang silingan sa barangay Lahug ning dakbayan sa Sugbo.

 Aron gawasnon gikan sa pagkabilanggo, mirekomendar si Gabud og P30,000 nga piyansa ngadto sa akusado.

 Ang biktima niingon nga niadtong Agosto 2, 2011 sa alas 5:00 sa kahapunon didto siya sa gawas sa ilang balay dihang gisagpa siya sa akusado ug gihulga nga patyon.

Tungod sa iyang kakuyaw nahadlok na siyang moeskwela.

Nasuta   sa evaluation report nga gihan-ay ni psychologist Rosemarie Gonato, nga ang bata nakasinati og “acute traumatic stress reaction,” usa ka matang balatian nga mugna sa hilabihang kalisang.

Apan sa counter-affidavit sa akusado lig-ong gihimakak niini ang maong pasangil apan giangkon niya nga igo lang niyang gikasab-an ang biktima.

Giangkon niini nga nasuko siya sa biktima human itukmod niini ang usa pa ka tuig niyang   anak babaye samtang nagduwa sila hinungdan nga nadusmo sa yuta ug nasamad ang ngabil.

Apan sa imbestigasyon nga gihimo ni Gabud nasuta niya ang gibug-aton sa testimonya sa bata.

“Ang positibong alegasyon ug pag-ila sa biktima sa akusado, milabaw sa negatibong alegasyon sa akusado, batok sa bata”, matud pa ni Gabud sa English.

Midugang siya nga dili ma-dismiss ang kaso batok sa akusado tungod kay ang pagbahad niini ngadto sa bata usa man ka maltreatment.

Tungod sa desisyon sa piskaliya nga ipasaka gayud ang kaso sa korte, ang akusado misang-at of motion for reconsideration apan wala kini hatagi og gibug-aton ni Gabud.

Alang kaniya walay igong rason aron usbon ang iyang rekomendasyon sa pagsang-at sa kaso   ngadto sa korte. (BANAT NEWS)