Ang kasaysayan karon

CEBU, Philippines - June 3, 1571— Nahitabo ang katapusang pakigbisog sa mga unang Filipino pinangulohan ni Rajah Sulaiman sa gitawag nga Battle of Bangkusay sa Manila diin gikasangka sa mga Filipino ang tropang Espanyol ug mga katribu ni Rajah Lakandula pinangulohan sa Espanyol nga si Martin de Goiti. Si de Goiti ug ang Spanish Governor General nga si Miguel Lopez de Legaspi mitawag sa maong dapit nga Manila.

1892— Natawo si Francisco Santos sa Bulacan, siya giila sa Pilipinas nga National Scientist niadtong 1983 tungod sa iyang malampusong buhat sa maayong panglawas ug agricultural chemistry.

1900—Miabot ang ikaduhang Philippine Commission nga gipangulohan sa Amerkanong si William Taft aron iimplimentar ang mga kamandoan sa Pangulo sa Estados Unidos human masakop ang Pilipinas sa Amerika.

1969— Atol sa giyera sa Vietnam nadasmagan sa Australian aircraft carrier nga HMAS Melbourne ang US Navy destroyer nga USS Frank E. Evans sa kadagatan sa habagatang bahin sa Vietnam. Nakalas sa maong aksidente ang 74 ka tripulanteng Amerkano nga nadala sa ilawom sa kaputol sa maong barko nga nalunod diha sa tungatungang bahin sa Spratlys ug Saigon.

1875 – Sa labing unang higayon malampusong nakapadala og ‘voice transmission’ ang Amerikanong imbentor nga si Alexander Graham Bell. Ang maong kalamposan ni Bell maoy gikonsiderar nga sinugdanan sa paggamit og telepono. (FREEMAN)