Pag-ayo sa Marcelo Fernan Bridge Mandaue ug Lapulapu andam na

CEBU, Philippines - Hingpit na nga nakapangandaman ang duha ka buhatan sa trapiko sa dakbayan sa Mandaue ug dakbayan sa Lapulapu alang sa gikatakda nga pag-ayo sa Marcelo Fernan Bridge nga magsugod karong Lunes Hunyo 4 ning tuiga.

Ang buhatan sa City Traffic Management System (CTMS) nga gipangulohan ni Frank Brazil mibutyag nga mobutang gyud sila og mga traffic enforcers sa tiilan sa maong pantalan diha sa ilang habig.

Kini sugdan sa sunod adlaw sa Department of Public Works and Highways (DPWH) ang pag-repair sa maong taytayan.

Matud pa niya nga iyang hipanglantawan nga mohinay gyud ang dagan sa mga sakyanan sa nahisgotang lugar tungod kay sirad-an ang pikas lane ilabi na panahon sa peak hours.

Si Lapulapu City Administrator Teodolo Ybañez nga maoy nakatambong sa Mactan Cebu Bridge Management Board (MBCMB) nga gipangulohan ni Gobernador Gwendolyn Garcia misugyot nga paablihan ang pipila ka alternatibong dalan diha sa sulod sa Mactan Benito Ebuen Airbase .

Plano nilang hangyoon ang kadagkoan sa maong base military aron makalusot ang mga sakyanan diha sa Sangi Road isip alternatibong lutsanan sa ilang ipatumang rerouting scheme.

Samtang si Edwin Ermac nga maoy executive director sa Traffic Enforcement Agency of Mandaue (TEAM) miingon nga andam na sila sa maong problema.

Adunay mga traffic enforcers nga ibutang aron mogiya sa trapiko sa tiilan sa maong taytayan diha sa habig sa Mandaue.

Gikabalak-an sa mga awtoridad nga maapektahan og dako ang mga pasaherong mobiyahe ug nag-apas sa ilang flights diha sa Mactan Cebu International Airport.

Gipaabot nga magbutang og work schedule ang DPWH diha sa dalan aron mapahibalo ang publiko sa oras nga posibleng lisud agian ang maong dalan aron sa ingon makapangandam sila.

Ang ayuhon sa maong taytayan mao ang pag-ilis sa rubberized expansion joints ngadto na sa metal expansion joints nga molungtad og 88 ka adlaw nga gidugayon. (BANATNEWS)