CEBU, Philippines - Ang Cebu Provincial Police Office (CPPO) maoy nag-una sa laing unom ka police office sa rehiyon 7 nga labing daghan og mga kalampusan sa ilang operasyon sa tulo ka kategoriya niining tuiga sumala ni Sr. Insp. Ramoncelio Sawan, deputy chief sa Regional Operation and Plans Division (ROPD).
Ang maong mga kategoriya naglakip sa illegal possession of firearms, illegal drugs ug illegal gambling.
Sa illegal possession of firearms ang CPPO may 42 ka malampusong operasyon, Cebu City Police Office (CCPO), 26, ug Negros Provincial Police Office (NPPO), 22.
Ang CPPO nakahimo usab og 36 ka positive operation batok sa illegal gambling, gisundan sa CCPO, 34, ug ikatulo ang Bohol Provincial Police Office, 17.
Unya ang operation batok sa illegal drugs, CPPO dunay 27, CCPO, 17 ug Bohol 14.
Hinuon matud pa ni Sawan, nga sa ilang evaluation sa performance sa nahisgutang mga police office dili pa sila makarekomendar kinsa ang hatagan og pasidungog ug kinsa usab ang ilang awhagon nga dublihon ang paningkamot. (BANATNEWS)