CEBU, Philippines - Namatay diha-diha ang usa ka ulitawo human kini tabangi og dunggab sa managsuon niyang silingan atol sa ilang panag-inom didto sa barangay Camugaw, lungsod sa Pinamungajan kagahapon lapas sa alas 12:00 sa tungang gabii.
Ang biktima nga wala na madala sa tambalanan mao si Jimmy Tanaco, 25, nga nagpuyo ra sa maong lugar.
Samtang ang mga suspek mao si Jason Gallardo, 20 , ug ang maguwang niini nga si Eddie Gallardo, 33, pulos mga ulitawo.
Si PO2 Jonard Singco sa Pinamungajan Police Station mibutyag sa Banat News nga ang biktima ug ang mga suspek nag-inom gikan pa sa sayong kagabhion niadtong Biyernes sa usa ka tindahan dili layo sa ilang balay.
Apan dihang nangalasbag na nagkalalis kini kay gipukaw man ang karaan nilang panagbangi ug dihang gibadlong sa tag-iya sa tindahan namauli sila.
Miuna og lakaw ang biktima apan gisundan kini sa magsuon ug pag-abot sa unahan ila kining gitabangan og dunggab ug ang nagkalainlaing samad sa lawas sa biktima maoy hinungdan sa hinanali niyang kamatayon.
Human mahagba sa yuta ang biktima nga naglunang sa kaugalingon niyang dugo, misuway og sibat ang mga suspek.
Apan nadakpan dayon kini sa kapolisan ug gibalhug usab dayon sa prisohan samtang nagpaabot sa tukmang kiha nga ipasaka batok kanila.(/WC) (BANATNEWS)