CH nangunay'g limpyo sa Barrio Luz Elem. School

CEBU, Philippines - Nangunay og limpiyo si Mayor Michael Rama kagahapon uban sa liboan ka mga empleyado sa Cebu City Hall sa Barrio Luz Elementary School.

Kini samtang gipangitaan pa og pamaagi unsaon pagsulbad ang mga nag-unang problema nga ilang nakita sa unang pagbisita nila sa mga pangpublikong tunghaan sa dakbayan.

Ang maong tunghaan maoy gigamit nga evacuation site sa mga nasunogan sa maong barangay sa miaging buwan ug namalhin na kini sa tagsa-tagsa nila ka mga area sukad pa sa miaging adlaw.

Ang clean-up drive nga gihimo sa maong tunghaan kabahin sa partisipasyon nga gitunol ni Rama alang sa programa sa Department of Education nga Brigada Eskwela.

Kahinumduman nga wala madungan ang Barrio Luz sa nasudnong Brigada Eskwela sanglit wala pa’y kabalhinan ang mga nasunogan niadtong higayona.

Samtang gimandoan na usab ni Rama ang engineering department nga espaltohon ang pipila ka bahin sa maong tunghaan tungod kay lapokon kaayo ang maong dapit ug mosamot pa kini karong ting-uwan.

Sa gihimong inspeksyon ni Rama sa nagkadaiyang tunghaan sa siyudad, nadiskubrehan niya nga kanunay nga peligro nga mohumok ang yuta sa Sapangdaku Elementary School, bukirang bahin sa habagatang distrito sa siyudad.    

Ang buhatan sa mayor nagplano nga ibalhin og laing dapit ang maong tunghaan aron malikay sa peligro ang mga tinun-an.

Ang siyudad gikatakda usab nga moapud-apod og 10,000 ka mga bangko alang sa mga tinun-an sa nagkadaiyang pampublikong tunghaan sa siyudad agi og pasiunang solusyon sa kakulangon sa lingkuranan.

Samtang gikatakdang ipaayo unya ang mga gubaong kasilyas ug pagtukod og dugang pa niini, samtang gipangitaan og paagi sa siyudad nga ma-repair ang mga koral alang sa seguridad sa mga tinun-an. (BANATNEWS)