Maestra ipabalhin sa laing lugar

CEBU, Philippines - Ang konseho sa Barangay Kalunasan mirekomendar nga ibalhin sa laing lugar ang giingong daycare teacher sa ilang lugar nga gipasanginlan nga nakigrelasyon sa tanod nga minyo.

Sumala pa sa usa sa mga kagawad sa maong barangay nga si Marvin Leyson nga dunay petisyon ang mga ginikanan sa mga estudyante batok sa maong magtutudlo nga gituki nila niadtong Biyernes nga nag-awhag nga ipabalhin kini og laing dapit.

Moabot sa kapin sa 40 ka mga ginikanan sa bata ang namirma ug nanawagan nga pailisan ang maong maestra gumikan kay dili alang kanila kini maayong ehemplo sa ilang mga anak.

Samtang gipadayag ni Leyson nga ipadangat nila sunod adlaw sa Department of Social Welfare and Services sa buhatan sa mayor ug sa Department of Education ang ilang rekomendasyon.

Gitun-an na usab nila ang posibleng silot nga ipahamtang ngadto sa tanod.  (BANATNEWS)