No smoking higpit nga ipatuman

CEBU, Philippines - Gipakusgan karon sa kagamhanan ang kampanya batok panigarilyo aron mahimong smoking free ang lalawigan sa Sugbo ug tibuok rehiyon 7.

Sa usa ka press conference nga gipahigayon kagahapon didto sa Department of Health (DOH)7 gibutyag ni Dr. Lakshmi Legaspi, Director III sa maong ahensya, mipasidaan   sa manigarilyo gumikan sa dakong peligro nga mahiagoman sa lawas ug kinabuhi niini.

Matud pa ni Legaspi nga dili lamang ang manigarilyo maoy mahiagom sa sakit sa cancer sa baga, cancer sa tutonlan, ug uban matang sa   sakit mugna sa aso ug nicotine sa sigarilyo, kundi bisan ang ubang tawo kinsa mahiagum sa second hand smoke.

Gibutyag ni Legaspi nga base sa rekord, matag minuto tagduha ka tawo ang mamatay gumikan sa panigarilyo sa tibuok kalibotan, busa matag oras adunay 120 ka tawo ang mamatay niini, 1,880 matag adlaw, 55,400 matag buwan ug 664,800 matag tuig.

Sa samang higayon gibutyag ni Legaspi nga matag segarilyo nga maupos sa manigarilyo motibhang og pito ka tuig sa kinabuhi niini.

Kini tungod kay ang sigarilyo adunay 4,000 ka kemikal nga mogusbat sa lawas sa tawo nga naglakip sa acetone, cadmium ug uban pa nga pulos mohatag og laygay nga hilo sa lawas sa tawo.

Busa matud pa ni Legaspi nga naningkamot ang DOH karon nga masayud ang manigarilyo sa kapeligro sa ilang dangatan kun magpadayon sila sa maong bisyo.

Maoy hinungdan nga tanang mga buhatan sa kagamhanan gibaoran na   sa pagdesiplina sa ilang mga kawani ug motuman sa memorandum circular nga gipadangat sa Civil Service Commission nga higpit nga nagdili sa sigarilyo sulod sa mga  opisina sa gobiyerno.

Nalambigit ning maong kampanya ang tanang mga local government unit (LGU) sa nasud ug kadtong mga LGU nga malampuson sa ilang “no   smoking campaign” ug nahimong “smoke free” nga LGU gihatagan og award.

Sa rehiyon 7, upat ka LGU ang nakadawat og tag P100,000 nga balor sa mga medisina isip ganti sa malampuson nilang kampanya nga naglakip sa lungsod sa Amlan, Zamboanguita, Bendoy ug Mabinay, Negros Oriental.(WC) (BANAT NEWS)