Duha ka langyaw napalgang patay

CEBU, Philippines - Duha ka mga langyaw ang napalgang patay usa kanila naghikog sulod sa iyang lawak sa miaging hapon sa sitio Luan-luan barangay Poblacion 1 syudad sa Carcar.

Ang naghikog nailhan nga si Ankush Kumar Batish, 23, usa ka Indian nga tigpautang nga kasamtangan nga nagpuyo sa maong lugar.

Sa imbestigasyon sa kapolisan, ang ig-agaw ni Batish nga si Hari Parkash maoy nakakita sa patay’ng lawas nga nagbitay na nga may pisi sa liog gikan sa sagunting sa kisame.

Inabagan sa laing Indian nga si Sandeep Kumar ilang giputol ang pisi ug gidala kini sa Binoya Hospital ug gibalhin sa Carcar City District Hospital apan gideklarar kini nga dead on arrival.

Sa pakighinabi sa kapolisan sa igsuon sa naghikog nga si Rajinder Kumar mitug-an kini nga ikaduha na kining higayon nga naghikog ang igsuon nga dunay deperensya sa pangisip.

Sa laing hitabo, patay nang nakit-an usa ka Hapones nga si Pogita Mitzou diha sa gipuy-an niini sa dalan M.L. Quezon sa barangay Cabancalan, dakbayan sa Mandaue sa miaging hapon.

Si SPO4 Fernando Gabutero sa Mandaue City Police Office (MCPO) mibutyag sa Banat News nga nakit-an ni Marivic Pelago piniyalan sa gipuy-an sa Hapones ang patay’ng lawas.

Nagduda si Pelago tungod kay pipila na ka adlaw niya kining wala makita maong pugsanon niyang giablihan ang balay ug nakita niyang patay na diay si Mitzou diha sa higdaanan niini.

Gituohang giurom o giatake sa sakit ang maong Hapon apan gikatakdang ipaawtopsiya ang patay’ng lawas niini. (BANAT NEWS)