Girapido 2 patay

CEBU, Philippines - Duha ka tawo, usa niini bata ang namatay samtang usa ang naangol sa pagpangrakrak pasado alas-10 sa miaging gabii sa sitio Luan-luan barangay Poblacion 1 syudad sa Carcar.

Ang mga nangamatay mao ang lalaking naila palang sa pangalan nga Glenn ug ang 16-anyos nga batang lalaki nag residente sa maong dapit ug gituohang napagan lang samtang ang naangol mao si Juanito Saraga, 41, taga Bohol.

Sa pakighinabi sa Banat News ni Elvira Cui, 39, iyaan sa 16-anyos nga menor de edad nga napagan, misaysay kini nga naglingkod sa gawas sa balay ni Robin dela Peña sila Saraga ug Glenn ug ang 16-anyos dihang nagbutobuto.

Giingong nag-inom sila si Saraga ug Glenn ug ang amaama sa bata nga si Darwin Alfafara nga giapas unta sa bata apan wala na niini maabti apan mao say pag-abot sa mamumuno nga nagsakay og motorsiklo ug mipaulan og bala kanila.

Ang 16-anyos naigo sa iyang ulo ug ingon man sila si Saraga ug Glenn. Ang tulo daling gidala sa Vicente Sotto Memorial Medical Center apan patay na ang bata ug si Glenn.

Dugang pa ni Cui nga duha palang ka semana gikan naabot sa ilang dapit sila si Saraga ug Glenn gikan sa Bohol ug nag-abang kini sa panimalay nga gipanag-iya ni Pedro Milagrosa.

Sa diha nga nahinabi sa Banat News si Milagrosa mibutyag kini nga niadtong petsa 21 sa Mayo nangabang ang duha sa iyang balay, giingong dunay babayeng kuyog ang duha apan wala na nila igkita pa ang maong babaye.

Matud pa niini nga ang duha mangomprahay og mga dugmok nga bulawan ug mga alahas ug lakip sa tuyo nila dinhi sa Sugbu mao ang mangita og trabaho.

Si Sr. Supt. Patrocinio Comendador, ang hepe sa Cebu Provincial Police Office misaysay nga aduna na silay ‘probable suspect’ apan ilaha pa kining susihon og maayo.

Giangkon ni Comendador nga ‘alarming’ na ang sunodsunod nga pagpamusil sa Carcar gikan sa pagpusil patay sa anak sa mayor nga si Carl Vinson Apura duha ka semana na ang nakalabay ug labing uwahi mao ang pagpangrakrak sa mga batan-ong nagpraktis og sayaw sa mao gihapong siyudad.

Si Mayor Nicepuro Apura mimando na sa kapolisan alang sa dinaliang kasulbaran sa maong mga kaso ug buot niyang pahigpitan ang pag-monitor sa mga mag-angkasay sa motor. (BANAT NEWS)