Pasahero gipusil sa tulisan

CEBU, Philippines - Tulo ka pasahero sa PUJ ang gitulis ug usa kanila ang napusilan sa mga tulisan kagahapon sa kaadlawon diha   tungod sa Chinese Cemetery sa barangay Lorega siyudad sa Sugbu.

Nakuhaan sa ilang mga kabtangan ug kwarta sila si Benie Sayson,35, taga McArthur Boulevard; Arnold Villanueva ug Melmarie Pajara pulos mga trabahante og pabrika.

Ang tulo ka mga tulisan giingong mipara sa ilang gisakyan jeepney diha sa tungod sa maong sam-ang duha niini ang mikapyot ug ang usa nga armado maoy milingkod ug midiretso og deklarar og tulis.

Apan matud pa samtang nanguha kini sa mga butang sa mga biktima nibuto ang armas niining gikuptan ug naigo ang bagtak ni Sayson hinungdan nga daling nangambak ang tulo ug midagan sulod sa maong sam-ang.

Ang mga sakop sa Mabolo Police Station ug Motor Riding Units (MRU) daling misuhid sa sulod sa maong sam-ang apan wala na nila maabti pa ang mga tulisan. Dako ang pagduda sa mga polis nga taga diha sa barangay Carreta ang mga tulisan.

“Nagkapyot sila (sa jeepney), declare dayon tulis ang usa nagpabuto dayon, duda ko sa drayber niaginod paman siya murag gihuwat naay makuha ang tulisan namo,” asoy ni Villanueva sa mga tigbalita. Si Sayson gidala sa mga polis sa tambalanan.  (BANAT NEWS)