Corona di na moapelar

CEBU, Philippines - Dili na moapelar pa si kanhi Chief Justice Renato Corona sa gidangatan niya human siya gipa-impeach sa impeachment court niadtong Martes ug giisip nalang niyang ‘closed chapter’ na sa iyang kinabuhi ang maong hitabo, sumala pa sa report sa ABS-CBN news.com.

Si Corona kinsa pabiling naa pa sa The Medical City ug nagpatambal sa iyang balatian nahukman sa impeachment court nga guilty sa “ betrayal of public trust and culpable violation of the Constitution” tungod sa wala niya pagdeklarar sa tinud-anay niyang katigayonan sa iyang Statement of Assets, Liabilities and Net worth (SALN) nga gimando sa Konstitusyon.

Daan nang mipahibalo ang mga abogado ni Corona nga moapelar sila ngadto sa Korte Suprema. Apan si Senate President Juan Ponce Enrile mipahimangno nang daan sa Korte Suprema nga dili malabwan sa maong hukmanan ang ilang desisyon sanglit base sa balaod ang Senado ra maoy gihatagan og gahom paghusay ug mohukom og mga impeachment nga kaso.

Ang karibal ni Corona sa Korte Suprema nga si Associate Justice Antonio Carpio mao karo’y temporaryong mikupot sa pwesto ni Corona. (BANAT NEWS)