CEBU, Philippines - Kritikal ang kahimtang sa inahan ug anak babaye human pusila sa kontra sa laing anak nga lalaki sulod sa ilang balay sa Sitio Bug-as, barangay Pangpang lungsod sa Barili, kagahapon sa alas 6:30 sa buntag.
Ang mga biktima mao si Merlita Antifuensto Blanco, 50, minyo ug ang special child nga anak niini nga si Jackielyn Blanco, 20, mga molupyo sa maong lugar. Samtang ang suspek mao si Vicente Misal alyas Inting,hingkod ug molupyo sa Sitio Binagyohan ,barangay Tubod –Duggoan, lungsod sa Dumanjug.
Si PO2 Hector Veloso sa Barili Police Station mibutyag sa Banat News nga nakurat nalang ang mga biktima sa kalit nga pag-abot sa suspetsado sa ilang balay nga masuk-anon ug nagdala og armas de fuego samtang nangita sa laing anak sa biktima nga si Jurod Blanco, hingkod, dayon gipamusil ang mga biktima.
Si Merlita nasabak sa walang bahin sa lawas, samtang si Jakielyn naigo sa bukobuko ug milapos sa tuong bukton niini. Si Jurod wa mapusili kay nakadagan nga wala hikit-i sa suspek.
Gihatud dayon sa Barili District Hospital ang mga biktima, apan gibalhin usab dayon sa tambalanan sa dakbayan sa Sugbo samtang ang suspek nakaikyas dayon human sa hitabo gipangita pa karon sa kapolisan.
Matud pa nasuko ang suspek kang Jurod kay nakit-an kining nakig-estorya sa kapuyo sa nahauna sa usa ka disco party sa barangay Basak nga sakop na sa lungsod sa Sibonga sa milabay’ng adlaw. (/WC) (BANAT NEWS)