CEBU, Philippines - Nakabsan diha-diha sa kinabuhi ang usa ka negosyante nga ex-convict human kini pusila sa wala hiilhing kriminal didto sa barangay Poblacion Oriental, lungsod sa Consolacion sa miaging Martes sa gabii.
Ang biktima mao si Marianito Lagahit, 62, minyo, residente sa maong dapit ug usa ka tigpatanto.
Sa imbestigasyon ni SPO3 Roy Sosvilla sa Consolacion Police Station nasayran nga sa alas 6:37 sa gabii nagbarug-barug ang biktima sa dapit nga nahitaboan dihang mihunong sa iyang atubangan ang usa ka motorsiklo nga gisakyan sa usa ka wala hiilhing driver.
Unya wala’y pangutana kalit lang gipusil niini ang biktima ug ang upat ka mga samad sa bala sa nagkalainlaing bahin sa iyang lawas maoy iyang namatyan diha-diha, samtang dali usab kaayong miikyas ang kriminal human matumba sa yuta ang biktima.
Nakapunit ang mga polis og upat ka basiyo sa kalibre .45 nga bala ug mga tingga sa bala sa dapit nga nahitaboan.
Matud pa ni SPO3 Sosvilla nga daghan ang mga anggolo nga ilang gisubay nga posibleng maoy hinungdan sa pagpusil patay kang Lagahit.
Usa niini mao ang iyang pagka-ex-convict gumikan sa kasong murder, unya may gikakontra usab kini nga silingan nga gipasakaan niya og kaso sa barangay, may gika-away usab siyang boarder sa iyang balay kay wala makabayad sa abangan, ug labaw sa tanan gitan-aw sa kapolisan ang pagpatanto niinii og kuwarta.
Padayon pang giimbistigar sa kapolisan ang tanang kalihokan sa biktima aron matumbok kinsay mipatay kaniya. (BANAT NEWS)