Mag-uuma nakuryentihan patay

CEBU, Philippines - Nahiagum sa hinanaling kamatayon ang usa ka mag-uuma human kini makuryentihe sa linya sa Cebu Electric Cooperative (CEBECO) didto sa barangay Caliongan, lungsod sa Dalaguete kagahapon sa alas 9:30 sa buntag.

Ang biktima mao si Enrique Bedro, 36, minyo nga mag-uuma ug nagpuyo sa maong lugar. Si SPO1 Veronico Centino sa Dalaguete Police Station mibutyag sa Banat News nga ang biktima gikang nangani og utanon sa iyang uma ug iya kining gisulod sa   bukag aron itumod sa merkado sa Caliongan.

Apan samtang   naglakaw ang biktima nga naglukdo sa iyang bukag nga puno sa utanon kauban ang iyang 14 anyos nga pag-umangkon nga si Ebaristo Catalan, pag-abot sa nahisgutang lugar, nahaurong kini gumikan sa kuryenting naputol ug nagbitay tungod sa dalan.

Tungod kay masaghid man ang iyang gilukdo nga bukag, iyang giwahing sa iyang kamot ang live-wire   nga nagbitay apan kalit siyang gidakop    sa kuryenti niini kay nag-uwan niadtong tungora ug basa ang yuta ingon man lang lawas mismo sa biktima hinungdan nga mipilit siya sa linya ug nakuryentihan. 

Ang iyang pag-umangkon nga nakalitan sa iyang nakita, nga mikirig ang iyang uyoan maoy nakapangayo og panabang sa mga tawong nagpuyo sa maong dapit.

 Dihang mirespondi ang mga polis patay na ang biktima ug ila nalang kining gihatud sa Saint Williams Funeral Homes sa lungsod sa Dalaguete aron kini ma-autopsy.

Gisuwayan sa Banat News ang pagkuha og pamahayag ang taga CEBECO kalabot sa maong hitabo apan wala kini makakuha og tubag gikan sa maong buhatan. (WC)(BANAT NEWS)