17-anyos na-hit and run patay

CEBU, Philippines - Patay ang usa ka 17-anyos nga lalaki human nadasmagan sa naghaguros nga motorsiklo samtang naglakaw gikan nagduwa og basketball pasado alas-5 sa hapon niadtong Domingo sa hapon diha sa national highway sa barangay Libho lungsod sa Tabogon.

Si PO2 Ronnie Alivio sa Tabogon Police Station nga nahinabi sa Banat News sa telepono kagahapon sa hapon miila sa biktima nga mao si Rodulfo Macamang,17, 3rd year high school ug residente sa nahisgutang lugar.

Nagduda ang kapolisan nga wala makabantay nga dihay naghaguros nga motorsiklo ang biktima maong kini nadasmagan ug tungod sa kakusog sa pagbangga nalabay si Macamang ug nabunal ang ulo niini sa karsada.

Gidala unta kini sa Verallo District Hospital sa dakbayan sa Bogo apan patay na kini tungod sa grabeng bun-og nga nahiagoman sa ulo sa biktima.

Ang nakabangga sa biktima nga nabagnos usab ang nawong niini sa semento daling gitabang sa iyang wala mailhing kauban ug misibat palayo sa lugar nga gibiyaan ang motorsiklo nga Suzuki Smash 110 kolor pula.

Matud ni Alivio nga nianang pagkagabii sa gihimo nilang follow-up operation nadakpan ang nakabangga sa biktima nga giilang si Roel Tuato, 24, sa pinuy-anan niini sa Upland sa dakbayan sa Danao ug gipasakaan kini og kaso. BANAT NEWS