CEBU, Philippines - Duha ang nalandig sa tambalanan human gipamusil nga naglakip sa 14-anyos nga menor de edad nga babaye samtang nangaon sa usa ka karenderia sa miaging alas-7 sa gabii diha sa sitio Silangan sa barangay Tejero siyudad sa Sugbu.
Si Ramil Cordita Dawang, 38, nagpuyo sa maong lugar nakaangkon og samad pinusilan sa bukobuko samtang naigo sa iyang kamot si Lanie Jabalde,14, 3rd year high school, nagpuyo sa maong lugar.
Subay sa imbestigasyon nila ni SPO1 Victor Ruel Ayuman, PO3 Lou Pagara ug PO1 Esmer Escultor sa Homicide Section nagbutyag nga si Dawang uban sa iyang kapuyong si Juvelyn Abestano ug ang 14-anyos nangaon sa karenderia dihang kalit lang milanog ang buto sa wala matinong kalibre sa armas gikan sa ilang luyo.
Ang duha ka biktima nakabatyag nga naminhod ang ilang bukobuko ug kamot diha na nila nahibaw-ang naigo sa pagpamusil sa wala mailhing tawo. Gidala ang mga biktima sa Cebu City Medical Center (CCMC) samtang wala na maabti ang wala mailhing tawong namusil. BANAT NEWS