CEBU, Philippines - Tulo ka oras nga brownout ang nasinati sa siyudad sa Sugbo ug pipila ka bahin sa dakbayan sa Mandaue kagahapong adlawa tungod sa pag-igo sa kilat sa usa sa ilang mga transformer sa ilang poste niadtong milabay’ng gabii.
Nagsugod ang brownout alas 7:00 sa buntag ug nabalik lang kini pagka alas 10:00 pasado na sa buntag human maayo sa mga sakop sa Visayan Electric Company (VECO).
Ang tigpamaba sa VECO nga si Ethel Natera mipasabot dihang nahinabi sa Banat News nga ang pagkapakgang sa kuryente bunga sa pag-igo sa kilat sa usa sa ilang mga transformer sa Cabancalan niadtong miaging gabii.
Ang mga lugar nga apektado sa brownout kagahapon sa buntag matud ni Natera mao ang tibuok dalan sa N. Bacalso Avenue hangtud na sa barangay Mambaling, Duterte St., gikan sa Banawa hangtud sa Salvador Extension sa Labangon, Guadalupe, SM City sa North Reclamation Area lahos na sa Park Mall ug Cebu International Convention Center (CICC) ug A. S. Fortuna St. sa Foodland sa dakbayan sa Mandaue.
Niadtong miaging adlaw taas-taas usab nga brownout ang nasinati sa pipila ka bahin dinhi sa dakbayan sa Sugbo tungod sa pag-igo sa kilat sa main transformer sa ilang poste.
Aron mabalikan dayon og kuryente ang napagngan matud pang Natera ilang giipon ang mga sobrang kuryente gikan sa mga substations ug maoy gibalhin sa linya diin naputlan sa supply sa kuryente. BANAT NEWS