TF Alpha mihimakak sa mga pasangil sa mga Oliva

CEBU, Philippines - Kusganong gihimakak ni Stephen Ybañez, sakop sa Task Force Alpha (TFA) nga nanghagad siya og sukmagay atol sa komosyon niadtong Biyernes sa gabii diha sa barangay Camputhaw ning dakbayan sa umagad ni Cebu City Treasurer Ofelia Oliva.

Si Ybañez uban sa lima niya ka mga kauban mibisita sa buhatan sa Investigation and Detective Management Branch (IDMB) human sila gipatawag ni Chief Insp. Bonifacio Garciano aron kuhaan sa ilang habig human sa hitabo niadtong Biyernes sa dihang si Ybañez gireklamo ni Oliva.

Gisaysay ni Ybañez sa Banat News nga matinahuron siyang mipara sa drayber sa awto nga matud pa niya ‘buta’ ang usa ka suga, nga nailang si Karen Olvido, anak ni Oliva pagreklamo niini ngadto sa kapolisan.

Matud niya nga nangyo pa siya og katahuran sa babaye nga drayber sa awto ug iya dayon kining gipahibawo sa violation nga bota ang pikas suga niini.

Apan ang maong babaye matud ni Ybañez miingon kini nga: “mao ba? motawag ko og Citom kay akoy gasuweldo ninyo,” asoy pa ni Ybañez nga mikutlo sa gisulti ni Karen.

Giangkon ni Ybañez nga iyang naingnan si Karen nga “gisugo ko nimu?” apan giklaro niyang sa hinay kini nga pagkasulti human siya giingan sa babaye nga ipadukdok ang sakyanan.

"Wala ko modukdok kay naa palay maguba, usa pa dili na pwede namo," dugang pa niya.

Matud ni Ybañez nga sa dihang iya nang gipangayoan sa lisensya si Karen aron ila lang tan-awon wala gyud kini mohatag ug nanirado hinuon, gihimakak usab niyang nasuko siya ug iyang gidukdok ang windshield.

Giangkon niini nga na-insulto siya sa gihimo ni Karen hinungdan nga nagpalaban siya ni Bimbo Arnaiz, ang team leader sa LTO apan wala gyud nila makuha ang lisensya sa maong babaye ug gihimakak niyang nanghagad siya og sukmagay.

Gitug-an ni Ybañez nga duna sila’y mga reklamong administratiba batok sa maong babaye nga ilaha nang gipasa ngadto sa LTO.    - BANAT NEWS