CEBU, Philippines - Nahimong malampuson ang fund-raising activity sa Cebu City Police Office (CCPO) ug mga sakop sa media alang sa mga polis nga nasunogan diha sa barangay Luz, dakbayan sa Sugbo.
Aron makatigom og pundo ang kapolisan ug media usa ka “concert for a cause” diha sa hawanan sa CCPO ang gipahigayon pinangulohan ni city police director Ramon Melvin Buenafe ug Chito Aragon, ang presidente sa Defense, PNP Press Corps (DEPP) migama usab og gilas sa gipahigayong proyekto.
Gawas sa concert dunay gipahigayong sayaw tali sa mga sakop sa media ug polis usab nga usa sa paagi nga makakuha og pundo.
Si Aragon nga nahinabi sa Banat News kagahapon nagkanayon nga karong adlawa ihatag ang natigom nga salapi ngadto sa mga polis nga nasunogan human sa ilang flag raising ceremony diha sa CCPO.
Matud ni Aragon nga base sa ilang talaan duna sila’y nalista nga upat ka mga polis nga nabiktima sa sunog apan gilauman nga modaghan pa kini tungod kay dunay mga bag-ong polis nga nasayrang mga nag-abang diha sa lugar ug giingong nalakip sa nasunogan.
Lakip usab sa mahinabangan mao si SPO4 Henry Obiso, ang kanhi hepe sa Talisay City Traffic Division.
Si Aragon nagkanayon usab nga dunay usa ka pribadong indibidwal nga si Scarlet Nadela ang misuporta usab sa nahisgutang proyekto ug mihatag og mga used clothing, noodles, bugas ug mga sardinas.
Si Aragon midugang nga ang maong gimbuhaton sa pagtabang sa mga sakop sa media ug kapolisan nga nabiktima sa katalagman ‘mutual responsibility’ na kini sa duha ka habig.
Kahinumduman nga ang kapolisan ug media kaniadto nagpasiugda gihapon og susamang concert diha sa Police Regional Office-7 aron makatabang sa nasunogang bombero ug sakop sa media diha sa T. Padilla, dakbayan sa Sugbo. (EIM)(BANAT NEWS)