Maglungag nga di manabon silotan

CEBU, Philippines - Gibalaod na sa kagamhanan sa dakbayan sa Talisay nga pabayron na og cash bond ang mga mokawot sa yuta alang sa konstruksyon nga tukoron o sa ubang katuyoan nga dili tabonan sa kinubkob nilang yuta.

Matud pa ni konsehal Rodi Cabigas, chairman sa committee on infrastructure nga sa dili pa magsugod og kubkob og lungag alang sa konstruksyon nga tukoron,   ang usa ka kontraktor pabayron og P50 mil nga cash bond.

Hinuon sumala sa ordinansa nga gipangamahanan ni Cabigas, iuli ra ang maong cash bond sa higayon nga mahuman na ang gitukod nga edipisyo ug ang tanang mga kinubkob nga yuta itabon pagbalik ngadto sa ilang gilungagan nga lugar.

Sa maong ordinansa gipasabot nga kun molapas sa 120 ka adlaw nga biyaan sa usa ka kontraktor ang lungag nga wala tabuni, sakmiton na sa kagamhanan ang ilang cash bond nga P50 mil.

Ingon usab niini ang mahitabo kun ang ilang kinubkob nga yuta biyaan nga dili hakuton, mag-atubang sa silot pinaagi sa multa ang mga kontraktor nga mobuhat sa ingon.

Matud pa ni Cabigas nga giumol niya ang maong ordinansa tungod kay daghan nang mga kaso sa Talisay nga biyaan lang sa mga kontraktor ang ilang mga kinubkob nga yuta nga maoy makabara sa agas sa tubig ug mahimong hinungdan sa lunop sa panahon sa tinguwan. (BANAT NEWS)