Akrho ug Tau Gamma misaad og kalinaw

CEBU, Philippines - Subling gipalig-on sa Alpha Kappa Rho(Akhro) ug Tau Gamma Phi (Triskelion) fraternities pinaagi sa pagpirma og bag-ong peace covenant kagahapong adlawa pasado alas 2 sa hapon diha sa atubangan ni Cebu City Police Office director Melvin Ramon Buenafe.

Si Eric Agcaoili, Visayas chairman sa Akhro mibutyag sa Banat News nga tinguha nila nga magmalinawon ang mga sakop sa duha ka grupo ug nagtinguha kini nga mosuporta sa mga proyekto nga ipahigayon niini.

Ang kapolisan maoy ilang gihangyong maoy mamahimong mediator. Gani, nangayo usab sila og hotline sa polis aron kun adunay panghitabo makatabang usab sila og pahibalo niini sa kapolisan.

Dugang pa ni Agcaoili gawas sa mga proyekto nga ilang suportahan, misaad usab sila nga mosuporta sa ilang mga national ug local leaders.

Gihulagway ni Agcaoili nga sukad sila mihimo og peace agreement kaniadto wala nay nahitabong kagubot sa duha ka grupo.

Gani, iyang giklaro nga dako gyud nga kasaypanan ang migawas nga report kalabot sa hinungdan sa kamatayon sa anak sa mayor sa syudad sa Carcar diin ang gitumbok nga gunman mga sakop sa Tau Gamma Phi nga ang tinuod dili diay.

Ang maong kalihukan gitambongan kini sa presidente sa Akhro nga si Major Jojo Del Rosario samtang sa Tau Gamma gitambongan usab kini ni Louie Sarte ug Rico Osmeña.

Dako ang panghinaot ni Agcaoili nga mapun-an pa og daghang katuigan ang kamalinawon ug paghinigalaay sa ilang mga sakop ug magkahiusa sa pagtabang sa katilingban.

Nasayran nga niadtong tuig 2006 unang nagsabot ang duha ka grupo human sa nagsunod nga mga frat wars nga mikalas og mga kinabuhi sa ilang mga sakop.

Samtang ang hepe sa kapolisan sa syudad sa Sugbo Sr. Supt. Ramon Buenafe,   mihulagway sa maong kalihokan nga ‘very significant’ tungod kay ang mga leader gyud sa duha ka grupo ang mihimo niini.

“It was very significant because it was initiated by the leaders of the Akhro and Tau Gamma themselves; they called on to me to host the event. (EIM)(BANAT NEWS)