Pagpatay sa judge Dagkong pamilya posibleng nagpaluyo

CEBU, Philippines - Gisusi karon sa NBI-Bacolod City ang posibleng kalambigitan sa mga dagkong pamilya sa 6th district sa Negros Occidental maoy nagpaluyo sa pagpatay kang Kabankalan Regional Trial Court Judge Henry Arles nga gipatay niadtong Abril 24.

Si NBI-Bacolod chief Ferdinand Lavin niadtong milabay’ng adlaw mibutyag nga base sa mga nakuptang mga kaso sa maong hukom dunay dakong posibilidad nga may kalambigitan sa maong pagpatay ang mga dagkong pamilya sa maong distrito.

Ang 6th district gilangkoban sa Kabankalan City ug Sipalay City, ug mga lungsod sa Ilog, Candoni, Cauayan, ug Hinoba-an. “We want to be able to identify or pinpoint sino itong clan behind the murder,” matud pang Lavin.

“We’re trying to tie up the shooters, who were on the ground or the hitman, with the mastermind,” dugang pa ni Lavin, kinsa miingon nga dunay usa ka babaye ug lalaking nakit-an diha sa sulod sa Kabankalan RTC building sa adlaw nga gipatay si Arles, kansang mga dagway mitakdo sa artist’s sketches nga gipagawas diha sa media. Gidudahang ang duha maoy “spotters” o “lookouts” sa gunman.

Sumala pang Lavin ang duha maoy misigurong migawas gyud ang biktima sa maong building ug nag-inusarang misakay sa iyang sakyanan. Dunay laing grupo nga misakay og traysikol nga misunod sa sakyanan sa hukom kinsa padulong na pauli sa iyang lungsod sa Ilog matud pang Lavin.

Base sa igo sa mga bala gihulagway nga professional shooter ang hitman. “Perfect hit, only three shots fired, despite 6:45 p.m. (nahitabo)., a little dark, at tinted ang sasakyan ng judge,” pasabot pa ni Lavin.

Si Arles,62, nakaangkon og tulo ka samad pinusilan agi sa .45 kalibre pistola sa gunman nga mieskapo luwan sa traysikol. Dako ang pagduda ni Lavin nga walo ngadto sa napulo ka tawo ang mga mihimo sa pagpatay ug sila pulos nag-operate sa maong dapit.

Ang NBI padayon pa sa pagpangita sa hitman nga gituohan nilang maoy magtudlo kanila si kinsa ang mga utok sa maong krimen.

Ang imbestigasyon sa NBI kadungan kini sa linaing imbestigasyon sa Negros Occidental Police Provincial Office nga mihulma sa Task Group Arles, nga gilangkoban sa kapolisan sa Ilog ug Kabankalan City, Investigation Operations and Intelligence Branches sa NOPPO, PNP Crime Laboratory, CIDG, PNP Legal Service, ug PNP Public Safety Company.

Matud pang Lavin regular nga nagbinayloay og impormasyon ang NBI ug ang task force lakip na sa kabanay sa biktima. Wala hinuon hatagi og tagal sa banay’ng Arles ang mga awtoridad kanus-a matapos ang imbestigasyon “We’re very happy that they trust our law enforcement agencies,” sumala pang Lavin.

Ang pamilyang Arles sa sayo pa mipadayag sa kaandam paghatag og P1-milyon cash reward ngadto sa si bisan kinsa impormante nga makahatag og importanteng impormasyon nga makaingon sa pagkasikop sa mga killers ug sa nagpaluyo niini sumala pa sa abogadong anak sa biktima nga si Atty. Maria Estelita Arles. Gawas sa maong cash reward dunay linaing P200,000 nga gitagana ang Philippine Judges Foundation alang sa susamang tinguha, base sa pamahayag sa tigpamaba sa Korte Suprema nga si Jose Midas Marquez.

Matud pa nga si Arles 13   ka tuig nga nahimong hukom sa Kabankalan RTC ug nakadawat na og daghang mga pasidungog tungod sa kapaspas niini pagresolba sa mga kasong makuptan, lakip sa nadawat niyang pasidungog ang Chief Justice Ramon Avanceña Award nga gihatag sa Korte Suprema niadtong 2008. (BANAT NEWS)