Naabtan sa akto nga nanuyop tiklo

CEBU, Philippines - Nasikop ang duha ka batan-ong lalaki kinsa naabtan sa akto sa kapolisan nga nagsuyop og shabu sa sulod sa usa ka payag didto sa dalan sa F. Ralota ,sa barangay Poblacion sa dakbayan sa Danao sa miaging gabii.

Ang nadakpan mao sila si Mark Pasana, 18, nga taga barangay Tabok Camalig sa maong dakbayan ug Jude Labador, 18, ulitawo nga taga sitio Cambiohan sa barangay Poblacion sa maong lungsod.

Si SPO2 Ildefonso Prosia sa kapolisan sa maong dakbayan miingon nga pinaagi sa kamandoan sa ilang hepe nga si Superintendent Ricky Delilis mopatrolya sila sa palibot sa maong dakbayan sa adlaw ug gabii.

Dugang pa niya nga sa miaging Biyernes sa gabii nahiagi ang ilang mga kaubang polis sa usa ka payag nga nahimutang sa dalan F. Ralota sa barangay Poblacion ug didto nila masigpati ang mga suspetsado nga nagsuyop og shabu

Gumikan kay pulos na nalipong sa gisuyop nilang illegal nga drugas nahaigking nalang kini sa kakurat dihang kalit lang mihagtik ang mga posas sa ilang mga kamot.

Nasakmit usab sa kapolisan ang mga kahimanan sa pagsuyop og shabu sama sa tin foil ug uban pa. Si SPO2 Prosia miingon nga ang duha gitanggong dayon sa bilanggoan samtang kaso nga kalapasan sa Republic Act 9156 kon Comprehensive Dangerous Drug Act of 2002 maoy ilang giandam nga kaso batok sa maong mga dinakpan. (BANAT NEWS)