Gitigbas sa silingan angol

CEBU, Philippines - Kritikal ang kahimtang sa usa ka tawo kinsa gitigbas sa iyang silingan didto sa dalan Highway sa barangay Looc, dakbayan sa Danao sa miaging gabii. Ang biktima mao si Constancio Gomez, hingkod ,samtang ang suspetsado mao usab si Diosdado Batoon, 61, minyo ug silingan sa biktima.

Si SPO2 Ildefonso Prosia sa kapolisan sa maong dakbayan nga nahinabi sa Banat News miingon nga sa wala pa ang hitabo, nag-estoryahanay pa ang biktima ug suspetsado sa usa ka tindahan sa maong dapit. Apan kalit nga mitumaw ang panaglalis sa duha nga misangpot sa kainit hinungdan nga mipauli ang suspetsado sa ilang balay.

Apan paglabay sa pipila ka oras mibalik kini nga nagdala og sundang nga may gitas-ong walo ka pulgada ug walay daghang langas giduol niini ang biktima dayon gipanigbas.

Matud pa ni SPO2 Prosia nga ang biktima nga nakalitan walay nahimo gawas sa pagpanagang sa mga tigbas apan nasamad gayud ang wala ug tuo niining abaga ug ingon man ang iyang ulo.           Diha-diha gihatud dayon sa mga silingan ang biktima ngadto sa Danao District Hospital apan gibalhin dayon kini ngadto sa Vicente Sotto Memorial Medical Center sa dakbayan sa Sugbo.

Hinuon ang suspetsado nadakpan usab dayon sa kapolisan kinsa mibalhog niini sa bilanggoan samtang gihikay na ang kiha batok kaniya. (BANAT NEWS)