City Treasurer mireklamo vs TF Alpha

CEBU, Philippines - Mibahad nga mopasaka og reklamo si Cebu City Treasurer Ofelia Oliva ug ang iyang anak nga babaye batok sa unom ka mga deputized agent sa Land Transportation Office-7 nga giingong mihulga ug mi-harass kanila.

Si Oliva ug ang iyang anak nga si Karen Olvido, 35, misumbong sa maong insidente ngadto sa Investigation and Detective Management Branch sa Cebu City Police Office (CCPO) niadtong Biyernes sa gabii batok sa mga sakop sa Task Force Alpha sa LTO.

Sa imbestigasyon sa kapolisan, alas 6:30 sa gabii niadtong Biyernes, si Olvido nagmaneho sa iyang awto nga nagtangag sa plakang KFW-420 diha sa dalan Escario, barangay Camputhaw ning dakbayan dihang gipara sa unom ka mga lalaki kinsa usa kanila nailang si Stephen Ybañez nga sakop sa TFA tungod daw sa depektosong headlights sa iyang sakyanan.

Si Olvido giingong mitubag nga “palihug ko’g pukpok sa headlights sir kay luag ra na siya. Bag-o pa man gud nang gipaayo,” apan giingong gitubag hinuon siya niini og “imo kong gisugo?”

Si Chief Insp. Bonifacio Garciano, hepe sa IDMB nagkanayon nga gipangayo ni Ybañez ang lisensiya ni Olvido apan wala niya kini ihatag ug gisirad-an ang bintana sa sakyanan. Giingong gialirungan si Olvido sa mga sakop sa TFA nga nagpunay og tuktok sa sakyanan lakip na ang usa ka babaye.                  

Tungod sa kahadlok ug kauwaw mitawag siya sa inahan kinsa miabot uban sa bana ni Olvido. Mipasangil usab silang walay kaubang organic nga LTO officer ang grupo.

Sa pag-abot ni Oliva ug sa bana ni Olvido mikuha og hulagway ang naulahi diha sa palibot apan giingong gisinghagan siya ni Ybañez sa pag-ingon: “unsa man, sumbagay ta?” dayong hamag. Si Oliva mipasangil nga ang babayeng enforcer ug si Ybañez mibuhi og dili maayong pulong nga daw nanghulga kanila hinungdan sa ilang kabalaka karon.

Ang mga sakop sa Special Weapon and Tactics (SWAT) daling miadto sa lugar ug mihusay sa maong kagubot apan desididong mopasaka og kaso ang mga reklamante.

Si Rene Borromeo, ang tigpamaba sa TFA miingon nga wala motahod si Olvido ug walay respeto sa mga law enforcers ug midugang nga dili lang headlights ang may deperensya sa sakyanan ni Olvido kay wala sad kini current year sticker sa plaka.

Gipasabot ni Borromeo nga parahon gyud nila ang mga sakyanan nga walay current year sticker aron masuta kung narehistro ba ang maong sakyanan.

Samtang giklaro ni Borromeo nga dunay supervisor nga organic officer sa LTO kauban sa TFA nga si Bemboy Arnaiz nianang tungora ug usa sa miduol ug mihangyo pagpaabli sa sakyanan ni Olvido.

Gihimakak usab ni Borromeo ang pasangil nga gisinggitan ug gihagad og sukmagay ni Ybañez ang bana ni Olvido tungod kay igo lang gibadlong ra kini sa pagsige niini kuha’g hulagway.

Matud pa ni Borromeo andam atubangon sa TFA ang pasangil nga ipasaka batok kanila sanglit normal nang adunay moreklamo batok kanila sa ingon niining trabaho. (BANAT NEWS)