Impeachment ni Corona duwa sa komunista

CEBU, Philippines - Si Kongresista Pastor “Jun” Alcover sa ANAD Partylist mibutyag nga makonbikto man o maabsuwelto si Chief Justice Renato Corona, kalampusan kining tanan sa komunista.

Atol sa Tapok-Tapok sa Sugbo nga gipasiugdahan sa Sugboanong Komentarista nga Nagpakabana (SUKNA) kagahapon, nagkanayon si Alcover nga ang impeachment ni Corona maoy duwa sa mga komunista.

Matud pa niya nga maoy hinungdan nga wala siya mobotar sa impeachment ni Corona dihang gisuta na sa House   kun pila ka magbabalaod ang mopirma sa impeachment ni Corona.

Si Alcover nga sakop sa komunistang pundok niadtong sayo nga mga tuig sa 1980 nagkanayon nga nasayud kaayo siya sa mga paagi sa komunista pagmugna   og kagubot sa Pilipinas.

Miingon siya nga bisan unsay dangatan ni Corona, makonbikto man o ma-absuwelto dako kaayo og ikadaot sa ekonomiya sa nasud kining tanan.

Usa niini mao ang paglikay na unya sa mga investor nga langyaw sa pagbubo og dagkong puhunan sa negosyo dinhi sa nasud karong giguba na ang secrecy law bahin sa mga depositong dolyar sa mga bangko dinhi sa nasud.

Midugang siya nga kasagaran sa mga komunista nga mga magbabalaod iyang mga kaila apan dili makigharong kaniya didto sa kongreso.  Ang labing nakapalagot ni Alcover kay sa panahong mohimo siya og privilege speech sa kongreso aron ibutyag niya ang mga binuang sa mga kongresistang  komunista pugngan ug dili siya patingugon hinungdan nga nagpabiling walay alamag ang ubang mga magbabalaod bahin sa sekreto sa mga komunista pagmugna og kagubot dinhi sa nasud.

Kauban ni Alcover nga mga Sugboanong magbabalaod kinsa wala mopirma sa impeachment ni Corona mao sila si Kongresista Pablo Garcia ug Pablo John Garcia. (BANATNEWS)