CEBU, Philippines - Patay ang usa ka 45-anyos nga babaye human nadasmagan sa naghaguros nga dumptruck nga nawad-an og preno diha sa national highway sa Barangay Sambagon, Pinamungajan niadtong Huwebes sa hapon.
Ang biktima gideklarar nga dead on arrival (DOA) sa Pinamungajan District Hospital giila sa kapulisan nga mao si Mercedes Canoy, 45, tungod sa grabeng bun-og nga naangkon sa iyang kalawasan ug ulo.
Ang nakadasmag sa biktima kinsa gitanggong sa Pinamungahan Police detention cell mao si Jimmy Indino Labitad, 32, sa Barangay Lut-od, samtang gipaabot nga pasakaan og kasong reckless imprudence resulting in homicide.
Si PO3 Renante Mahusay, sa Pinamungajan Police Station, nagkanayon nga si Labitad nagmaneho sa mini dumptruck nga gipanag-iya ni Junjun Cerna paingon sa barangay Poblacion.
Matud ni Mahusay nga samtang nagdagan si Cerna sa national road kalit lang nibuto ang rubber cap sa ligid niini hinungdan nga nawad-an na siya og kontrol sa manobela sanglit nawad-an naman og preno ang dumptruck.
Ang biktima niadtong higayona nga naglakaw daplin sa karsada maayong pagkaigo ug nalagpot. Hinuon wala maunsa ang mga sakay nga mga tawo gikan sa bukid sa maong trak. (BANATNEWS)