Hepe patudloan og pakigkooperasyon ngadto sa media

CEBU, Philippines - Gitangtang ni Police Regional Office-7 director, Chief Supt. Marcelo Garbo ang hepe sa Womens and Childrens Protection Desk (WCPD) sa Minglanilla Police Station nga si Insp. Ma. Theresa Gutierez ug gibalhin diha sa Police Regional Headquarters sa Camp Sergio Osmeña Sr. Mihangyo unta ang mga sakop sa PNP Defense Press Corps ngadto ni Garbo nga dili nalang tangtangon sa Minglanilla si Gutierez human nahilot na ang kasungian niadtong Miyerkules sa dihang gipatawag ni Sr. Supt. Patrocinio Comendador ang mga sakop sa media ug sa maong opisyal.

Gani human sa diyalogo niadtong Miyerkules si Gutierez nangayo’g pasaylo ngadto sa mga sakop sa media.

"I recommended that she was transfered to R5, so that she will learn how to deal people specially the media," pasabot pang Garbo sa press conference kagahapon.

Kahinumduman nga miadto ang mga sakop sa media sa Minglanilla Police Station aron sa pag follow-up niadtong 14-anyos nga giingong gilugos sa iyang 80-anyos nga apohang lalaki apan inay makakuha og impormasyon gipakitaan hinuon og di maayong pamatasan sa maong opisyal ang media hinungdan sa reklamo.

"We will be addressing this problem," matud ni Garbo kinsa tulo ra ka buwan nga iyang idestino si Gutierez diha sa Police Community Relation (PCR) aron duna kini makat-onan.

Si Sr. Supt. Orlando Ualat, Chief of Staff sa PRO-7 miingon nga niadto rang Lunes ang kamanduan nga ilang giluwatan nga gibalhin si Gutierez apan sa miaging adlaw lang kini gipatuman. "Actually dili siya relieved, detailed lang last Monday ang order pero gahapon pa gi-implement," sumala pang Ualat nga nahinabi sa mga tigbalita kagahapon sa hapon diha sa PRO-7. (BANATNEWS)