Kagawad nga nakapatay sa bayaw mitahan

CEBU, Philippines - Kasong homicide maoy gipasaka batok ni barangay Upper Bugho kagawad Heracleo Pacquiao tungod sa pagpatay sa iyang bayaw nga si Marcos Genon niadtong Lunes sa gabii.

Si Prosecutor Petronio Elesterio mipasaka na ngadto sa korte ang kasong homicide batok sa konsehal human kini nagdumili pagduso og counter-affidavit kalabot sa pasangil batok kaniya.

Si Elesterio mirekomendar og P40 mil nga piyansa bugti sa temporaryong kagawasan sa kagawad kinsa matud pang SPO4 Ruben Reynes nga nahinabi sa Banat News didto sa barangay kapitan sa maong barangay nga si Pedro Sibial kini mitahan.

Matud pang Reynes ang kagawad miingon nga iyang nahimo ang krimen tungod kay gisulong siya niini ug igo ra kining midepensa sa iyang kaugalingon. Giingong adunay armas ang biktima dihang gisulong ang balay sa kagawad.

Base sa imbestigasyon sa kapolisan ang komprontase sa duha misangpot sa pagpanion sa biktima og armas ngadto sa kagawad hinungdan naglayog ang duha ug nailogan sa armas ang biktima ug napusilan sa kagawad.

Kagahapon sa hapon mipiyansa si Pacquiao sa buhatan ni Regional Trial Court Branch 21 Judge Eric Menchavez. BANAT NEWS